Verfraura
Da reischtana Sack um d Ahsla rum,
Sei’ Zipfelkappa’n im Anka,
So loihnat der Bua am Fealbabom
Und dichtat in seini Gedanka.
Deam Büable, deam isch so wind und waih
Vom Schual- und Stubahocka,
Im Feald duß findt as da gfraurna Schnai
Statt Veigelessträuß und Glocka.
Und s ma’ nu’ dussa’n im Grüana sei’,
Und s ma’ nu’ s Vogelgsang haira,
Und s ma’ nu’ hüata’n im Sonnaschei’,
Jahr Leut, wear will ems verkaihra?
Da reischtana Sack um d Ahsla rum,
So thuat der Bua vernaura,
Ear loihnat so still am Fealbabom –
Der Bua, der ischt verfraura.