Lanqand li jorn son lonc en mai

Lanqand li jorn son lonc en may,
M'es bels douz chans d'auzelhs delonh,
E qand me sui partitz de lay
Remembra.m d'un amor de lonh,
Vauc de talan enbroncx e clis
Si que chans ni flors d'albespis
No.m platz plus que l'yverns gelatz.

Ben tenc lo seignor per veray
Per q'ieu veirai l'amor de lonh,
Mas per un ben qe me n'eschay
N'ai dos mals, car tant mes de lonh.
Ai! car me fos lai pelegris,
Si qe mos fustz e mos tapis
Fos pelz sieus bels huoills remiratz!

III

Be.m parra jois qan li querray,
Per amor Dieu, l'amor de lonh,
E s'a lieys platz, albergarai
Pres de lieys, si be.m sui de lonh.
Adoncs parra.l parlamens fis
Qand drutz lonhdas er tan vezis.
C'ab bels digz jauzirai solatz.

Iratz e gauzens me.n partray
S'ieu ja la vey l'amor de lonh,
Mas non sai coras la.m veyrai,
Car trop son nostras terras lonh,
Assatz hi a portz e camis,
E per aisso no.n sui devis;
Mais tot sia cum a Dieu platz!

Ja mais d'amor no.m gauziray
Si no.m gau d'est' amor de lonh
Qe gensor ni meillor no.n sai
Ves nulha part ni pres ni lonh:
Tant es sos pretz verais e fis
Qe lai el renc dels Sarrazis
Fos hieu per lieys chaitius clamatz!

Dieus qe fetz tot qant ue ni uai
E fermet cest' amor de lonh
Me don poder, q'el cor ieu n'ai,
Q'en ieu veya l'amor de lonh
Verayamen en loncs aizis,
Si qe la cambra e.l jardis
Mi resembles toz temps palatz!

VII

Ver ditz qui m'apella lechay
Ni deziran d'amor delohn
Car nuills autre jois tant no.m play
Cum jauzimens d'amor de lonh
Mas so q'en ieu vuoill mes tan tahis,
Q'enaissi.m fadet mos pairis
Q'ieu ames e non fos amatz.

VIII

Mas so q'ieu vuoill m'es tan tahis:
Toz sia mauditz lo pairis
Qe.m fadet q'ieu non fos amatz!

Collection:

French

1133

Jaufré Rudel

Qand lo rossignols el foillos [Q]and lo rossignols el foillos Dona d'amor e.n qier e. n pren, E.n mou son chant jauzen joios E remira sa par soven, E.il riu son clar e.ill prat son gen, Pel nouel deport que reigna Me.n ven al cor grans jois jazer. D'aqest amor son tant cochos...	Qan lo rius de la fontana Qan lo rius de la fontana. S'esclarzis si cum far sol, E par la flors aiglentina, E.l rossignoletz el ram Volf e refraing et aplana Son doutz chantar et afina, Dreitz es q'ieu lo mieu refraigna. Amors de terra loingdana, Per vos totz lo...	No sap chantar qi so non di No sap chantar qui so non di, Ni vers trobar qui motz no fa, Ni conoys de rima quo's va Si razons non enten en si. Pero mos chans comens'aissi Com plus l'auziretz, mais valra. Nuils hom no'ys meravilh de mi S'ieu am so que no veyrai ja, ni nulha...	Lanquan lo temps renovelha Lanquan lo temps renovelha e par la flors albespina, ai talant d'un chant novelh qu'ieu sai cum lo chans refri (...) (...) ; doussament per miey la bruelha lo rossinhol s'esbaudeya. E quand lo bosc reverdeya, nays fresca e vertz la fuelha...
Lanqand li jorn son lonc en mai I Lanqand li jorn son lonc en may, M'es bels douz chans d'auzelhs delonh, E qand me sui partitz de lay Remembra.m d'un amor de lonh, Vauc de talan enbroncx e clis Si que chans ni flors d'albespis No.m platz plus que l'yverns gelatz. II ...

More from Poet