Quanno nascette Ninno

Quanno nascette Ninno a Bettlemme
Era notte e pareva miezo juorno.
Maje le Stelle - lustre e belle
Se vedetteno accossí:
E a chiù lucente
Jette a chiammà li Magge ’a ll’Uriente.

De pressa se scetajeno ll’aucielle
Cantanno de na forma tutta nova:
Pe ’nsí agrille - co li strille,
E zompanno accà e allà;
È nato, è nato,
Decevano, lo Dio, che nc’ha criato.

Co tutto ch’era vierno, Ninno bello,
Nascetteno a migliara rose e sciure.
Pe ’nsí o fieno sicco e tuosto
Che fuje puosto - sotto a Te,
Se ’nfigliulette,
E de frunnelle e sciure se vestette.

A no paese che se chiamma Ngadde,
Sciurettero le bigne e ascette ll’uva.
Ninno mio sapuritiello,
Rappusciello - d’uva - sì Tu;
Ca tutt’amore
Faje doce a vocca, e po ’mbriache o core.

No ’nc’erano nemmice pe la terra,
La pecora pasceva cu ’o lione;
Cu ’o capretto - se vedette
’O liupardo pazzeà;
Ll’urzo e ’o vitiello
E co lo lupo ’n pace ’o pecoriello.

S’arrevotaje ’nsomma tutt’o Munno,
Lu cielo, ’a terra, ’o mare, e tutt’i gente.
Chi dormeva - se senteva
’N pietto ’o core pazzeà
Pe la priezza;
E se sonnava pace e contentezza.

Guardavano le pecore ’i Pasturi,
E n’Angelo sbrannente chiù dô sole
Comparette - e lle dicette:
No ve spaventate no;
Contento e riso
La terra è arreventata Paraviso.

A vuie è nato ogge a Bettalemme
Dô Munno ll’aspettato Sarvatore.
Dinto ’i panni ’o trovarrite,
Nu potite maje sgarrà,
Arravugliato,
E dinto a lo Presebbio curcato.

A meliune ll’Angiule calate
Co chiste se mettetteno a cantare:
Gloria a Dio, pace ’n terra,
Nu chiù guerra - è nato già
Lo Rre d’ammore,
Che dà priezza e pace a ogne core.

Sbatteva ’o core ’n pietto a ssi Pasture;
E ll’uno ’n faccia a ll’auto diceva:
Che tardammo? - Priesto, jammo,
Ca me sento scevolí
Pe lo golìo
Che tengo de vedé sso Ninno Dio.

Zompanno, comme ’a ciereve ferute,
Correttero ’i Pasture a la Capanna;
Là trovajeno a Maria
Co Giuseppe e a Gioja mia;
E ’n chillo Viso
Provajeno no muorzo e Paraviso.

Restajeno ’ncantate e boccapierte
Pe tanto tiempo senza dì parola;
Po jettanno - lacremanno
Nu suspiro pe sfocà,
Da dinto ’o core
Cacciajeno a migliara atte d’ammore.

Co ’a scusa de donare li presiente
Se jetteno azzeccanno chiano chiano.
Ninno no li refiutaje,
Ll’azzettaje - comme a dì,
Ca lle mettette
Le mane ’n capo e li benedicette.

Piglianno confedenzia a poco a poco,
Cercajeno licenzia a la Mamma:
Se mangiajeno li Pedille
Co ’i vasille - mprimmo, e po
Chelle Manelle,
All’urtemo lo Musso e ’i Mascarielle.

Po assieme se mettetteno a sonare
E a cantà cu ll’Angiule e Maria,
Co na voce - accossí doce,
Che Giesù facette: ah aah...
E po chiudette
Chill’uocchie aggraziate e s’addormette.