Ganging to and Ganging frae

Nae star was glintin’ out aboon, The cluds were dark and hid the moon; The whistling gale was in my teeth, And round me was the deep snaw wreath; But on I went the dreary mile, And sung right cantie a’ the while I gae my plaid a closer fauld; My hand was warm, my heart was bauld, I didna heed the storm and cauld, While ganging to my Katie. But when I trod the same way back, It seemed a sad and waefu’ track; The brae and glen were lone and lang; I didna sing my cantie sang; I felt how sharp the sleet did fa’, And couldna face the wind at a’. Oh, sic a change! how could it be? I ken fu’ well, and sae may ye— The sunshine had been gloom to me While ganging frae my Katie.